敖早

敖早
「敖早！要去佗？」「沒啦！四界行行咧！」親像這款對話你是毋是陣陣聽到咧！尤其在庄腳，人情味卡重，厝邊隔壁攏是熟識的郎。一透早甲郎見面，若毋甲郎相借問，郎一定會感覺真奇怪。用一句「敖早！」來打招呼，會凍呼郎感覺你真親切，郎若是仝款用笑瞇瞇的面容來對待你，甲你開港，相信你一透早就會有歡喜的心情來開始一工的工課。
親像阮阿嬤，今年已經六十外歲啊，老大郎可能卡淺眠，逐工就早就起床。伊今馬尚大的興趣，就是透早起來運動、去菜園種菜、晚時甲郎去補校讀冊。我甲阮阿嬤尚親，阮阿嬤嘛尚疼我，所以伊若去運動，攏會招我鬥陣去。
一透早行到學校的運動埕，一卦老歲仔見面，就敖早來敖早去，老朋友見面話就講袂ㄙㄨㄚ、。若是看到我，就開始找話題囉！「啊！這恁孫哦！生做澎皮啊澎皮，擱真古錐哦！」，這時阮阿嬤就會講這是某覓郎，袂曉叫哦！就按咧我才開嘴叫郎。所以我跟在阮阿嬤的身軀邊，嘛學就濟甲人鬥陣的道理。
我是一個學生囡仔，在學校除了讀冊以外，生活中的規矩嘛真重要。透早起床，背冊包要來去讀冊，若是看到愛心媽媽在顧路口，阮這些學生囝仔就會開嘴講一聲「愛心媽媽敖早！」。行入校園內底，若是看到校長甲老師，阮嘛會講一聲「校長敖早！」「老師敖早！」。阮若是做了好，老師就會甲阮呵咾，講阮真有禮貌，若是做毋好，伊就會提醒阮，要阮改進。
郎在講：「花喫露水，人喫嘴水」，一個郎若是好嘴，會曉甲郎相借問，總是會給郎好印象。透早時，會曉用一句「敖早」來甲郎打招呼，這是尚平常的禮貌，毋通一支嘴裝惦惦。早起時，空氣好，給郎感覺精神好，充滿希望，想看麥咧！你是毋是每工攏真敖早咧！